Aktar għajnuna u assistenza finanzjarja mill-KMS lir-Regatta Nazzjonali

Waqt laqgħa mal-klabbs u l-Għaqda Regatta, il-Kunsill Malti għall-iSport ħabbar aktar għajnuna lill-klabbs tar-Regatta biex kompla kkonferma li lest juri bil-fatti li l-għan tal-KMS hu li jkompli jgħolli l-livell tar-Regatta u jagħmel dan l-avveniment sportiv u kulturali aktar segwit fost il-poplu Malti.

Fil-fatt ic-Chairman tal-KMS Bernard Vassallo nieda aktar assistenza finanzjarja lil kull klabb għar-Regatta Nazzjonali li se ssir fit-8 ta’ Settembru 2010. Huwa ta’ nformazzjoni dettaljata ta’ din l-għajnuna finanzjarja għal Settembru 2010 fejn spjega li, fost l-oħrajn, il-KMS se jżid is-sussidju li kull klabb jirċievi meta jipparteċipa u jtemm kull tiġrija.

Kategorija A

Fil-każ ta’ Kategorija A, is-sussidju skond ir-regolamenti huwa ta’ €150 għal kull opra li ttemm tiġrija.

Għal Settembru 2010 il-KMS se joffri €30 oħra bħala sussidju. Dan ifisser li f’kull tiġrija ta’ din il-kategorija, kull klabb li jtemm tiġrija skond ir-regoli jirċievi €180.

Għalhekk, meta kull klabb normalment jieġu sehem f’kull tiġrija (5) ta’ kategorija A, dan ifisser li s-sussidju massimu għal kull klabb mingħand il-KMS huwa ta’ €900.

Dan minbarra l-premijiet li klabb jista jirbaħ jekk jidħol fl-ewwel 3 posizzjonijiet f’kull tiġrija:

Tiġrija Dgħajes A Tal-Midalji:

L-Ewwel Premju: €300; it-Tieni: €200; it-Tielet €150

Tiġrija Frejgatini:

L-Ewwel Premju €195; it-Tieni €145; it-Tielet €115

Tiġrija Dgħajes C Tal-Pass:

L-Ewwel Premju €160, it-Tieni €110, it-Tielet €80

Tiġrija Kajjikki

L-Ewwel Premju €160, it-Tieni €110, it-Tielet €80

Tiġrija Dgħajes B Tal-Pass

L-Ewwel Premju: €300; it-Tieni: €200; it-Tielet €150

Kategorija B 

Fil-każ ta’ Kategorija B, is-sussidju skond ir-regolamenti huwa ta’ €150 għal kull opra li ttemm tiġrija.

Għal Settembru 2010 il-KMS se joffri €20 oħra bħala sussidju. Dan ifisser li f’kull tiġrija ta’ din il-kategorija, kull klabb li jtemm tiġrija skond ir-regoli jirċievi €170.

Għalhekk, meta kull klabb normalment jieġu sehem f’kull tiġrija (5) ta’ kategorija A, dan ifisser li s-sussidju massimu għal kull klabb mingħand il-KMS huwa ta’ €850.

Dan minbarra l-premijiet li klabb jista jirbaħ jekk jidħol fl-ewwel 3 posizzjonijiet f’kull tiġrija.

Tiġrija tad-Dgħajjes C Tal-Pass:

L-Ewwel Premju €140; it-Tieni €95, it-Tielet €70

Tiġrija Dgħajes A Tal-Midalji:

L-Ewwel Premju: €280; it-Tieni: €185; it-Tielet €140

Tiġrija Frejgatini:

L-Ewwel Premju €175; it-Tieni €130; it-Tielet €105

Tiġrija Kajjikki:

L-Ewwel Premju €140, it-Tieni €95; it-Tielet €70

Tiġrija Dgħajes B Tal-Pass:

L-Ewwel Premju: €280; it-Tieni: €185; it-Tielet €140

Premju Qaddiefa Żgħażagħ

Minbarra dawn iż-żidiet fis-sussidju kemm f’Kategorija A kif ukoll B, għal Regatta 8 ta’ Settembru 2010, il-KMS se joffri premju speċjali lil dawk iż-żewġ klabbs li jkollhom l-iżgħar medja ta’ snin fost il-qaddiefa tagħhom.

Fil-fatt dak il-klabb, fost is-sebgħa li jieħdu sehem fir-Regatta, li jkollu l-iżgħar medja se jirċievi €150 waqt li t-tieni klabb ikklassifikat jirċievi €100.

Vassallo spjega li l-KMS se joffri dan il-premju sabiex jippremja t-talent żagħżugħ fir-Regatta.

Fond extra ta’ €2,000 għal Regatta 8 ta’ Settembru 2010

Jekk wieħed jgħodd din l-għajnuna kollha ġdida mħabbra mill-KMS għal Regatta 8 ta’ Settembru 2010, wieħed jasal għal total ta’ €2,000 maħdum kif ġej:

Żieda fis-sussidju Kategorija A: €30 X 35 = €1050

Żieda fis-sussidju Kategorija B: €20 X 35 = € 700

Premju Qaddiefa Żgħażagħ: € 250

TOTAL €2000 

Regatta Settembru 2010:

Fond totali ta’ sussidji u premijiet għal-klabbs tar-Regatta

Wara l-inizjattivi mħabbra din il-ġimgħa stess, għal Regatta Settembru 2010, is-somma totali ta’ €16,935 hija allokata mill-Kunsill Malti għal-iSport għal klabbs tar-Regatta, somma li tikkonferma kemm il-KMS lest li jgħin l-isport tar-Regatta.

Fond Premijiet

Kategorija A: €2455

Kategorija B: €2230

Total: € 4,685

Sussidji:

Kategorija A: €6300

Kategorija B: €5950

Total: €12,250

Total ta’ Premijiet u Sussidji mill-KMS għar-Regatta Settembru 2010: €16,935